Малын дархлаажуулалтын ажил гацахад хүрэв

2025/10/02 11:31

Аравдугаар сарын 1-нээс улсын хэмжээнд намрын шүлхийн дархлаажуулалтын ажлыг зохион байгуулахаар Мал эмнэлгийн ерөнхий газар (МЭЕГ) төлөвлөжээ. Шүлхий нь мал сүрэгт хурдан тархаж, эдийн засгийн ихээхэн хохирол учруулдаг халдварт өвчин тул улирал бүрийн дархлаажуулалтыг тасралтгүй хийх шаардлагатай юм.

Гэвч малын эмч нар хаврын шүлхийн дархлаажуулалтын үеэр үзүүлсэн үйлчилгээний хөлсний үлдэгдэл болох 50 хувийн санхүүжилт өнөөдрийг хүртэл олгогдоогүй учир намрын дархлаажуулалтын ажилд оролцох боломжгүйгээ мэдэгдээд байна. Тэдний хэлж байгаагаар өнгөрсөн долдугаар сард Төрийн сангаас “санхүүжилтийн эрх нээгдсэн” тухай мэдэгдэл гарсан боловч бодит олголт хийгдээгүй хэвээр байгаа аж.

МЭЕГ-ын мэдээлснээр Монгол Улсад жил бүр хавар, намрын улиралд мал сүргийг шүлхий, цэцэг, боом зэрэг халдварт өвчнөөс сэргийлэх дархлаажуулалт хийдэг. Дархлаажуулалтын ажил гацах нь малын өвчлөл нэмэгдэх, улмаар малын гаралтай бүтээгдэхүүний экспортод ноцтой хүндрэл үүсэх эрсдэлтэй. Учир нь малын эрүүл мэндийн баталгаажуулалт нь олон улсын худалдааны гол нөхцөлүүдийн нэг юм.

Иймээс малын эмч нарын цалин, үйлчилгээний хөлсийг хугацаанд нь олгох нь зөвхөн мэргэжлийн хүмүүсийн хөдөлмөрийг үнэлэх асуудал бус, улс орны хүнсний аюулгүй байдал, экспортын найдвартай байдлыг хангах чухал нөхцөл болохыг салбарынхан онцоллоо.

Нэмж дурдахад, 2025 оны улсын төсвийн тодотголтой хамт УИХ-д өргөн мэдүүлсэн тогтоолд төрийн албанд хэрэгжүүлэх хэд хэдэн арга хэмжээ тусгагджээ. Энэ хүрээнд төсвийн төлөвлөлт, хуваарилалтын үр дүнтэй байдлыг баталгаажуулж, зардлын үр ашгийг нэмэгдүүлэх зорилгоор тодорхой чиглэлүүдийг баримтлахыг үүрэг болгосон байна. Тэдгээрийн нэг арга хэмжээ нь малын вакцин болон мал эмнэлгийн үйлчилгээний зардлын 50 хувийг малчдаар төлүүлэх зохицуулалтыг тусгасан явдал юм. Энэ нь улсын төсвийн дарамтыг бууруулах, нөгөө талаар малчдын оролцоог нэмэгдүүлж, мал сүргээ халдварт өвчнөөс урьдчилан сэргийлэх ажлыг хамтын хариуцлагын хүрээнд зохион байгуулах зорилготой юм.

https://itoim.mn/a/2025/09/29/event/cds?4a268e06994fa495e6081edd1a0f4cca

Сэтгэгдэл

АНХААРУУЛГА: Уншигчдын бичсэн сэтгэгдэлд ZAVKHAN.nutag.mn хариуцлага хүлээхгүй болно. ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Сэтгэгдэлтэй холбоотой санал гомдлыг 9318-5050 утсаар хүлээн авна.

Zavkhan.nutag.mn

Малын дархлаажуулалтын ажил гацахад хүрэв